On visiting Sweden

(a twentieth century poem)

Dis far ahead, I towt it widna maitter.
I wis surprised.
It took a start afore I realised
wan difference dere,
when da aald man spak,
when faiders an midders, my generation,
spak o demsels as bairns.

Spak aboot lives unbrokken in wan place,
uncles at lived ta be faiders,
kennin der grand-uncles, graandfaiders,
every link in da chain:
twa generations at, gie or tak a few,
saw oot der time.

Nae war memorials, nae Poppy Days.
Nae questions at you kent you didna ax.
Naebody’s uncle crippled in a camp.
Naebody’s faider crazied ida head.
Naething at onyeen could mind or ever heard o
but ordinary life.

Years o schöl photos, forward inta time,
wi every bairn at ever sood a been
in line…

Tell me,
foo lang is a shadow? 

 

Glossary:
a start - a little while

 

© Laureen Johnson 2009

Read the New Shetlander for the best of Shetland writing:
http://www.shetland-communities.org.uk/scss/new-shetlander.html

Contact: The New Shetlander,
SCSS, Market House, Market Street, Lerwick ZE1 0JP.
Tel. +44 (0) 1595 743 902,
Fax. +44 (0)1595 696787,
e-mail: scss@shetland.org

Subscriptions:
Annual subscription rates (4 issues):
UK £10.60;
Overseas £12.00;
Overseas airmail £16.60